إزاي تحقّق 7 مصادر دخل ليك وأنت لسة طالب وبتدرس؟ | الربح من الإنترنت 💲💵💰

كونك دخلت المقال دا ف أنت واحد من اتنين,

يا طالب بيسعى إنه يحقق ربح مادي وهو بيدرس, يا واحد بيشتغل ولكن عاوز يزوّد دخله, فتابع الفيديو للنهاية وإن شاء الله تلاقي فيه ما ينفعك

واحد من الصراعات الكبيرة اللي بيواجهها طالب الجامعة خصوصا طلبة الطب زيي أو الكليات اللي عدد سنينها كبير عموما واللي تقبلها بيبقى صعب بالنسباله هي إنه يعدي سن العشرين والخمسة وعشرين وهو لسة بياخد المصروف من أهله

ومع الأحوال الاقتصادية الحالية دا ممكن يزوّد جواه الصراع, كون الوقت بيمر والأعباء بتزيد ع الأهل وهو لسة لازال بياخد مصروف من أهله

علشان كدة أنا جاي في الفيديو دا يا صديقي الساعي ويا عزيزتي الساعية أقولكم بعض الطرق الحقيقية الحلال اللي تقدروا من خلالها تحققوا مصدر دخل كويس يحققلكم الاستقلال المادي اللي بتسعوا ليه أو أقلها يخفف الحمل عن الأهل

فكرة إنك تنزل وأنت طالب بنفسك تشتغل صنعة أو تتعلم حرفة معينة خصوصا لو في كلية بتتطلب مجهود كبير زي طب أو هندسة ممكن تكلفك ماهو أغلى من الفلوس

وغالبا أصلا هتواجه رفض من الأهل والمجتمع خصوصا وهما مش شايفين الشغل غير احتياج مادي, رغم إنه العكس تماما وإن نفسيا رغبة الاستقلال المادي بتكون غريزة بداخل أي حد في سنك ف أنت طبيعي جدا وزي الفل متخافش

طيب إزاي تحقق دخل مادي محترم وأنت في بيتك وكمان بشكل يخلي الأولوية لدراستك أو حتى لو بتشتغل وحابب تزوّد دخلك من الإنترنت

في الفيديو دا أنا جاي أقولك على بعض الطرق المضمونة اللي هتقدر تشتغل بيها وتدخل بيها فلوس بالدولار, ومن بيتك, وبدون سابق خبرة أو راس مال,

و كلها طرق أضمن لك نجاحها بنسبة 100% وبعضها إما أنا أو حد أعرفه جرّبها ونجحت معاه فعلا كمان أنا راعيت إن أولويتك الدراسة والمفروض يكون ليها الوقت والاهتمام الأكبر

علشان كدة هتلاقي الأفكار دي إما بتدعم دراستك نفسها وبتستثمر فيها أو على الأقل مش هتأثر عليها بالسلب لو عرفت تدير وقتك صح طوّلت عليك ف المقدمة معلش, ورقة وقلم ويلا بينا نبدأ

اربح من مذاكرتك

كونك طالب ف أنت أكيد واجهت معضلة إنك تحضر محاضرة لدكتور أو مدرس معين ومتفهمش منه شيء

أو يكون السورس اللي مطلوب منكم تعتمدوه كمصدر أساسي للمذاكرة هو بالأساس غير صالح للمذاكرة فيه وصعب الفهم والاستيعاب منه

وهنا ييجي دورك في حل المشكلة دي واستغلالها في تحقيق دخل مالي ليك وهو إنك تاخد المصدر الغير منظم دا واللي صعب المذاكرة منه وتحوّله لمصدر منظم وجذاب وسهل المذاكرة منه

أقولك على حاجة هتديلك امتياز أكبر؟ سواء في دراستك أو في نجاح المشروع دا؟ هو إنك تسمع بنفسك شرح الدكتور وتكتب أهم الأسئلة والملحوظات في نفس المصدر اللي أنت بتنظمه بحيث يكون شامل ويمكن الاعتماد عليه في المذاكرة من الطلبة كلها طيب خلاص تحمست للفكرة ونويت تطبّقها, إزاي تبدأ فعلا تشتغل عليها؟

1- الخطوة الأولى هي كيفية إعداد الكتب والملفات دي, وهنا الطرق كتير ولا تحصى, لكن هقولك الحل الأسهل والأسرع ليك واللي مش هيتطلب منك لا خبرة ولا اشتراكات مدفوعة وهو موقع كانفا, وعلشان تعرف تستخدم الموقع بسهولة, هسيبلك دليل شامل للموقع تحت في الديسكريبشن

2- الطريقة التانية وهي النشر, بدل ما تكلّف نفسك وتجيب أنت ماكينة تصوير, ف ممكن تتفق مع مكتبة تصور هي ملفاتك دي مقابل نسبة من الأرباح

3- الخطوة التالتة وهي التسويق, ف بما إنك عامل الموضوع من الأساس كحل لمشكلة موجودة بتعاني منها أنت ودفعتك فجروب دفعتك هيكون كافي علشان يستخدم مصادرك ولو كان مصدر جدير بالثقة والإعجاب وكان الحاجة اللي بتشرحها دي ليها شريحة كبيرة من المهتمين ممكن تبيعها كمنتج الكتروني من خلال الانترنت كمثال أنا ممكن دلوقتي أعمل سكريبت الفيديو دا على هيئة كتاب الكتروني وأبيعه أونلاين بالسعر اللي أحبه

الربح من العمل الحر الفريلانس

الفريلانس الفريلانس الفريلانس الفريلانس مصدر ربحي فوق الممتاز وليه مزايا كتير جدا زي إنك حر نفسك, زي إن أرباحك ملهاش حد أقصى,

زي إنك بتشتغل ببجامة البيت وعلى سريرك عادي جدا بدون ما مدير يعاقبك أو موظف يفتن عليك,

في اعتقادي إن أي إنسان بيعيش العصر الحالي ومعندوش الإمكانية يشتغل أونلاين بمهارته أو يبدأ يكتسب واحدة ويشتغل بيها ف هو بيهدر على نفسه نعمة وباب خير كبير

الفريلانس ممكن ياخد منك وقت مش قليل ع بال ما تلاقي عائد منه,

بس صدقني لو خدت خطوة دلوقتي هتشكر نفسك كتير عليها بعد كام سنة قدام الموضوع ببساطة مش هيتطلب منك غير

1-إنك تبدأ تدور ع مهارة مهتم بيها وتبدأ في تعلّمها, سواء مونتاج, برمجة, موشن, جرافيك ديزاين أو أي مهارة أنت بتحبها حتى ولو الكتابة على الوورد

2- تبدأ تعمل لنفسك سابقة أعمال من خلال برامج تدريب مجانية أو حد مثلا شايف إنك تقدر تخدمه, زي إنك تعرض على قناة يوتيوب تعمل لها مونتاج مجاني أو بسعر رمزي لو بتعمل مونتاج أو تعمل موقع لنفسك يبقى دليل على كفائتك أو تصور بموبايلك علشان تثبت مهارتك في التصوير والقائمة تطول

3- بعد ما تلاقي نفسك عملت سي في محترم, ف أنصحك لو بإمكانك يبقى تعمل موقع تحط فيه السي في دا لأنها أكتر طريقة احترافية تعرض بيها شغلك ويكون ليك تواجد على الإنترنت وتوصل لعملاء جدد

4- بعدها السنين مع الشغل هتديك الخبرة والفلوس واتنغنغ في الدولارات يا زعيم

بس برضه علشان تبص للموضوع نظرة واقعية بدون تزيين وبدون ما نبقى overrated الموضوع هسيبلك بوست تحت يوصفلك رحلة الفريلانس بتجرد ويديلك لمحة عن مزاياها وعيوبها

تقدر تبدأ من بعد الفيديو دا مباشرة,

مش محتاج أكتر من جهاز متوصل بالانترنت ووقتك بدل ما تصرفه ع السوشيال اصرفه في تعلم مهارة تشتغل بيها وأنا هنا ع قناة اليوتيوب أو ع قناة التليجرام هتلاقيني بنزل كورسات وشروحات لأفضل منصات التعلم الذاتي

طيب تتعلم أي مهارة وإيه المهارة الأفضل والأنسب ليك؟ شوف الفيديو دا علشان تعرف إيه أعلى المهارات ربحا بحيث متبدأش ف مهارة مش هتعود عليك بعائد مادي كويس

والفيديو دا علشان تعرف تتعلمها ازاي طيب

بالنسبة للناس اللي ممعهاش جهاز يساعدها تشتغل كفريلانسر تعمل إيه؟ أنا هقولك على بعض الخدمات اللي ممكن تقدمها من موبايل وتبدأ تشتغل بيها برضه كفريلانسر

خدمات يمكنك تقديمها من هاتفك

1- تصميم الثمنيل على كانفا وبيعها لليوتيوبرز الواحدة ب5 دولار

2- عمل QR لبيانات العملاء وبيعها ليهم وهيساعدك في دا مواقع زي:

https://www.the-qrcode-generator.com/

3- مونتاج فيديوهات السوشيال ميديا على قوالب جاهزة باستخدام كاب كات

4- إدارة صفحات السوشيال ميديا للمشاهير والشخصيات العامة والمشغولة زي الدكاترة وغيرهم ولو متعرفش ازاي تقدر تتعلم من كورسات منزلاها فيسبوك نفسها ومجانا

5- كتابة بوستات الفيسبوك والسوشيال ميديا, كورس واحد في الكوبي رايتنج هيكون البوابة ليك علشان تبدأ

6- التصوير في حال كانت كاميرا موبايلك كويسة, وممكن تعمل أكونت انستجرام تعرض عليه صورك أو تبيعها مباشرة على مواقع زي فريبيك وكانفا وشطر ستوك

7- في حال لغتك كويسة ممكن تدخل على موقع زي preply وتعلم الأجانب اللغة العربية بأقل حاجة 5 دولار للساعة

8- بمايك ب125 جنيه تقدر تبدأ شغلك في مجال الفويس أوفر وبعدها تعدل الصوت بأدوات الذكاء الاصطناعي بدون ما تحتاج حتى لأي برامج

9- الترانسكريبشن او التفريغ وهو انك تقوم بتحويل اي محاضرة طويلة لكلام مكتوب اللي يقرأه يبقى كأنه سمع أو شاف المحاضرة أو الفيديو أو البودكاست دا بنفسه وهنا هقولك على أداتين هيقوموا بالشغل نيابة عنك هسيبلك روابطهم تحت الفيديو:

– موقع https://dictation.io/

– بوت https://t.me/transcriber_b

إنشاء مدونة الكترونية

الطريقة التالتة هي إنك تعمل مدونة,

وقبل ما تقول أنا مليش في التدوين والكتابة ف استنى متتجاوزش النقطة دي علشان حرفيا ممكن تكون هي السبب في تغيير حياتك كلها

الكتابة والتدوين كانوا تقريبا هما أول وسيلة علشان أدخل عالم الربح من الإنترنت وأبدأ أشتغل أونلاين الموضوع أبسط مما في خيالك ومش بيتطلب منك المهارة الكتابية الخارقة اللي جت ف بالك أول ما ذكرت الطريقة دي

والأهم من دا إنك قادر تعمل مدونة احترافية تكسب منها كل شهر أكتر من 100$ وبدون أي خبرة برمجية, بدون خبرة كتابية, وبدون حتى مصاريف أو فلوس تدفعها كرأس مال

كل اللي عليك هتدخل على أحد مواقع شركة جوجل اسمه بلوجر.كوم هتعمل حساب بالجيميل بتاعك عادي جدا هتكتب اسم وعنوان المدونة بتاعتك زي ما انت عاوز

وبالنسبة لهتكتب إيه, ف انت مش مطلوب منك غير إنك توفر محتوى ممكن يفيد غيرك ولو بمعلومة واحدة او حتى لو مجرد بس هتكتب مشاعرك, أو شعر أو نثر أو زي ما تحب

علشان ما أزحمش عليك بالتفاصيل في الفيديو دا هتلاقيني عامل لك دورة كاملة عن كل ما يتعلق ببلوجر,

بالإضافة لسيشن كامل هيعلمك إزاي تحترف كتابة المحتوى على الموقع والمدونات وبثقة في الله ثم في المحتوى اللي هتلاقيه في الفيديوهات دي لو ذاكرتها كويس هتطلع منها قادر تعمل مدونة كفيلة تدخل لك فلوس بأكتر من خمس طرق ربح ممكن تحققلك الاستقلال المالي اللي بتحلم بيه!

أشغال يدوية للبنات

لو أنتي بنت وعاوزة تحققي دخل كويس من بيتك ف بالإضافة للأفكار اللي فاتت واللي جاية ممكن تكسبي من مهارتك اليدوية

ولو معندكيش حاجة أنتي شاطرة فيها فدلوقتي بقى سهل عليكي تتعلمي أي حاجة عاوزاها من يوتيوب أو شات جي بي تي أو حتى وورك شوبس اوفلاين لناس عندها خبرة ف الحاجة دي

ممكن تتعلمي تعملي:

– طارات وديكورات المناسبات زي اللي بقت منتشرة كتير الأيام دي

– ممكن تعملي مشروع تصميم وبيع الشموع

– ممكن تتعلمي تصاميم وزخرفة الهدايا

– ممكن تشتغلي في طباعة المجّات والتيشرتات والهدايا ولو ملكيش في التصميم ف ممكن تشغلي معاكي مصمم جرافيكي يعملك التصاميم وانتي تطبعيها واي هواية او مهارة يدوية تقدري تتعاملي معاها كمشروع وبيزنس متكامل تعملي حساب على انستجرام وتبدأي تسوقي لمنتجاتك وتبقي دارسة بروسيس شغلك من أول التسويق لحد الشحن والدفع ومخططاله كويس وبشكل احترافي مش مجرد هواية والسلام

تعمل متجر وتبيع منتج ملموس

من الأفكار اللي جاتلي أنا شخصيا بالأخص إني من طبيعة عملي إنشاء المواقع والمتاجر على الإنترنت هي إني أعمل بيزنس لبيع المنتجات الطبية ويكون ليا متجر على الإنترنت أبيعها من خلاله

والحقيقة الفكرة دي ملهاش عمر أو زمن معين, طول ما عندك الحماس والاستعداد, ودارس أبعاده بشكل كويس ف توكّل على الله في أي وقت تسنح لك الفرصة فيه بس المهم تعرف إزاي تنافس ويكون للمنتج بتاعك الأفضلية بين المنافسين اللي بيبيعوا نفس منتجك

ومش ضروري تعمل متجر احترافي وتدفع فلوس تكاليفه, دلوقتي صفحات السوشيال ميديا قادرة توفرلك إمكانية إنك تعرض منتجك وتبيعه بشكل أوتوماتيكي وكأنه فعلا متجر أنت عامله بنفسك

اكسب من فهمك

من الأفكار اللي شوفتها ناجحة مع بعض زمايلي هي الكورسات, بالأخص في كلية زي كليتي ف كورسات زي الاسعافات الأولية والتثقيف الطبّي بتكون منتشرة وعليها إقبال كبير جدا من عامة الناس وغير المختصين,

باعتتبار إننا أهل التخصص والأجدر بثقتهم في تلقّي معلومات زي دي كذلك أنت أيا كان تخصصك ممكن تستثمر فيه وتشرح البرانش أو المادة أو التخصص اللي أنت متمكّن فيه سواء لزمايلك أو للدفعات اللي أصغر منك لو أنت في طب ممكن تشرح أحياء لطلبة ثانوي أو لو هندسة ممكن تشرح رياضيات وهكذا

دي تعتبر unfair advantage ليك استغلها وابدأ مشروعك في التدريس منها ممارسة وتعلم ومنها فلوس ومصدر دخل وكمان بيرسونال براندينج قوي ليك

طب خلينا نقول إنك شخص خجول ومبتحبش تحتكّ بالناس كتير, في الحالة دي ف الخيار الأفضل ليك هو الكورسات المسجلة بإمكانك تسجّل دورة خاصة بيك تشرح فيها الحاجة اللي بتحبها أو شايف نفسك قوي فيها وتبيعها بعدها على منصات بيع الكورسات العالمية وتبدأ تكسب بالدولار على رأس المنصات دي واللي جربتها شخصيا هي منصة يوديمي

اربح من مجالك

ممكن لو أنت مش عاوز تشغل بالك بأي مجال غير مجالك ف ممكن تكلم حد كيبير ومشهور في تخصصك وتطلب منه تنزل معاه تدريب حتى لو مجاني

ومن هنا هتكتسب الخبرة والعلاقات اللي بعدها توسع مداركك في مجالك وتخليك تحقق مصدر ربح كويس منه وبأفكار مكنتش تخطر على بالك الكلام دا يشمل كل المجالات سواء كنت دكتور مهندس محامي او اي كلية او مجال تاني

تعمل قناة يوتيوب

بكاميرا موبايلك وهاند فري أو مايك بويا ب125 جنيه تقدر تبدأ قناة يوتيوب وتبدأ نشاطك أونلاين

وهنا هصدمك وأقولك بلاش تاخد الخيار دا لو هدفك فقط ربح المال, لأنه بطيء وهياخد منك وقت ومجهود كبير ومش هتجني ربح إلا بعد ما مشاهداتك توصل مئات الألاف شهريا

وهبقى أسيبلك في التعليقات رابط قناة هتلاقي فيها الأدوات اللي محتاج لها بأسعار وخصومات حلوة جدا

طبعا أنا حاولت أحقق معادلة صعبة خلال الفيديو,

وهي إني أديلك أكبر معلومات ممكنة ممكن تفيدك وتساعدك ولكن في وقت قليل بحيث متملش او تسرح

علشان كدة لو فيه معلومة مش واضحة أو سؤال مجاوبتش عليه خلال الفيديو اكتبهولي في التعليقات وهجاوبك عليه بإذن الله

واكتبلي في التعليقات, ياترى أي مجال تحمست له وناوي تبدأ فيه ويكون هو مصدر دخلك أونلاين؟ يمكن تلاقي حد يقدر يساعدك م اللي بيشوفوا الفيديو معاك

لا تنسوني من صالح دعاكم,

سلام.